भइल कवन गलती कसुरवा , हमसे कोहाई गइला बदरू। अइला ना अबकी सवनवा, हमसे कोहाई गइला बदरु।।

(कोहाई गइला बदरू) भइल कवन गलती कसुरवा , हमसे कोहाई गइला बदरू। अइला ना अबकी सवनवा, हमसे कोहाई गइला बदरु।। धरती से धधकेला ,सगरो अगिनिया , दिनवा में सुरुज दहके , रतिया चननिया । कहवा लुकाई गइला बदरु , छाती पिटी रोवेला किसनवा ।। सवनवा में ना अइला बदरू।।1।। चार बूँद चुइके, हमके चिढ़ावेला , गरजी चमकी - चमकी , अंगुरी विरावेला । काहे खिसिआई गइला बदरू , बरसेला बम्बई शहरवा , सवतिया लोभाई गइला बदरू।।2।। झूरे रोपावेला , रोपनी के बेरवा , झम- झम बरसेला , कटनी के बेरवा। दिनवा भुलाई गइला बदरू, काहे सठिआई गइला बदरू । "अनीता" देनी तोहके ओरहनवा ।। सवनवा में ना अइला बदरू।।3।। भइल कवन गलती कसुरवा , हमसे कोहाई गइला बदरु। अइला ना अबकी सवनवा , कहवा भुलाई गइला बदरू।।