तोहके देई कवन गारी, अनीता राज की इस रचना को एक बार अवश्य पढ़ें

( तोहके देई कवन गारी ) हमहन के फूँक के अपने करेला रंगदारी , बदरू दहिजरू तोहके , देई कवन गारी ।।। फ़जीहत में परान अपने फुरसत में जियेला , लागे ना सरमिया इज्जत घोरी के पियेला । लाज ना लिहाज के , करेला समझदारी ।। बदरू दहिजरू तोहके , देई कवन गारी ।।। छियालीस के डीगरी प हमके सधावेला , कोयला नियर भूंज के शेखी बघारेला छेदे घाम देहियाँ में , तलवार दुई धारी ।। बदरू दहिजरू तोहके , देई कवन गारी ।।। छोड़ाई देब अइठन तनी भुइयां उतर जा , चेतावेनी"अनीता"देव अभियों सुधर जा । देइके दरखास केस , लगाइ देब भारी ।। बदरू दहिजरू तोहके , देई कवन गारी ।।। देवी माई के देहब तोहे दहिजरू क नाती , ओखरी में कूट देहब अइबा कहियों दाती । चूल्हिया में झूंक मुंह झंऊसू तोहे जारी । बदरू दहिजरू तोहके , देई कव गारी ।।।। धरती पियासल हाँफे असों के असढ़़वा , प्रेम बूँद सवाति के चुवावा हो बदरवा । दशों नह जोरी ,"अनीता" रहिया निहारी , बदरू दहिजरू तोहके , देई कवन गारी ।। हमहन के फूँक के ,अपने करेला रंगदारी ।। बदरू दहिजरू तोहके , देई कवन गारी ।।। (अनीता राज)